18日漫遊‧英國蘇格蘭之旅 (3) - 倫敦篇 Day 2

倫敦篇 Day 2 - 遇上治癒系泡泡大叔

第二日正式向倫敦景點進發！

琴晚去supermarket買定早餐，我地發現Russell Square地鐵站附近 (Brunswick入面) 有間大超市叫Waitrose，有野食有日用品買，自製早午晚餐慳錢之選。

是日行程：倫敦塔 --> Tower Bridge --> London Bridge --> 沿River Thames行個大圈 --> Borough Market --> 大笨鐘 --> London Eye

 

去Kings Cross站搭車時一定要抬頭望望對面座
St Pancras Renaissance Hotel，好似城堡咁靚
 

倫敦塔 Tower of London，被稱為英國現存最完美嘅中世紀城堡

不過入場費有啲貴，我地只係喺外面行下

 

倫敦塔隔離就係Tower Bridge (遠方果2舊野)

見到中間果堆紅色野嗎？原來係紅色罌粟花

為咗紀念第一次世界大戰一百周年而造嘅裝置藝術

遠睇真係好似一片血海...

 

 來一張Tower of London x 罌粟花海

 

London古舊建築 + 黑白菲林 = 回到過去 (架房車係穿崩位)

 

各位團友，到咗Tower Bridge啦！

 

原來可以上去橋上個塔架，有展覽睇，不過作為窮鬼我地都係留返喺地面算數

 

London Bridge is falling down, falling down ......♬♬♬

遠方OS：喂 Bitch！我叫Tower Bridge，唔好再認錯我係London Bridge！
(In fact London Bridge 個外表好普通，普通到我竟然連一張相都無影低...)

 

倫敦塔對面沿住泰晤士河行會見到一個廣場，附近有好多coffee shop

 

再行遠啲就會見到一間教堂 Southwark Cathedral

轉入內街就到 Borough Market 啦

 

 英國間間教堂都有佢自己嘅特色

 



 Borough Market

千祈千祈千祈唔好星期日去，我地去到先知原來市集無開
得返2-3檔熟食開門 ☠☠☠

 

 食飽飽向Big Ben進發

 

如果bus tour改成horse tour 就正啦

(我地真係見到有police騎住馬喺馬路行必，好型)

 

終於見到Big Ben真身！

 

Big Ben斜對面就係London Eye，新與舊的對比



 

 唔記得邊條橋上拍

 

巧遇單車比賽，都有唔少觀眾喺旁邊打氣

 

行到去London Eye附近，原來除咗個輪之外仲有個飛天蜘蛛！

逆光下的倫敦眼

 

由於今日行太多路，我地攰到喺眼仔下面塊草地瞓著咗...

去旅行可以咁hea真係好...

 

公園除咗大片草地仲有個 Merry-go-round

 

 

 亦有好多街頭表演者喺度賣藝，有樂器表演、花式單車

不過都係呢個爆炸頭大叔最得我心

估下佢表演啲乜？

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 原來係玩番皂泡波波！！！

見佢喺水桶加清潔劑，搞2搞，再放自己織嘅繩網落盤水度
一拉起個網就可以整成唔同大小嘅波波

 

然後再"漾"啲波波去現場觀眾度！睇下啲小朋友幾興奮！

原來用網網可以整到啲泡泡好大好密！包住成個人都得！
材料其實好平好簡單(上圖一眼睇哂)，但就可以令到無數人進入瘋狂狀態
我完全被呢位大叔迷倒，足足睇咗佢3場Show先捨得走

 

快樂唔洗用錢買，一個泡泡已經夠令大家開懷大笑

 日落黃昏，多謝泡泡大叔帶俾我地一個愉快嘅下午

♥♥♥♥♥

 

待續...



18日漫遊‧英國蘇格蘭之旅 (1)

終於完成期待已久嘅18日英國‧蘇格蘭遊！

行程路線：香港 --> 倫敦 --> 約克 --> 愛丁堡 --> 蘇格蘭高地 --> 湖區 --> 利物浦 --> 倫敦 --> 香港

多數朋友聽到我去英國就會問2個問題：

問題1)「仲會唔會其他歐洲地方?」當我答NO就會再問：
問題2)「淨係去英國唔悶咩？」

其實視乎你有咩expectation，英國無乜主題樂園 (好似無)、無夜市 (除咗London英國好多shop 5點半準時收舖)、食野貴、買野貴... 不過如果你有足夠時間深度遊，其實英國有多有特色、有歷史價值、風景好靚嘅地方好值得一去

唔怕話你知，我第一次衝出亞洲咋，大鄉里出城，所有事物即使係一塊招牌、一個渠蓋都覺得非常新奇，快門不停 “卡擦卡擦”

為咗呢個旅程我帶備咗大量武器(相機)同彈藥(菲林)，不過意外接二連三發生，慘不忍睹。包括相機無電(但無帶後備電)、部Polaroid電有問題影出黎黑哂、拉斷片、影到中間筒菲林過唔到片(但亦都卷唔返入去要強行打開背蓋)、以為一路影緊但原來部機無過到片(俗稱交白卷)、成個過片杆甩咗出黎等等，唔出門都唔知自己有幾黑仔…

 

人生路不熟周圍搵電真係好慘，大家唔好學我

講返行程，英國自由行其實唔算難，交通都好方便，不過有少少細節要注意，以下係我經驗總結：

火車：

由於我今次行程比較去得多地方，點與點之間搭火車最方便又平啲。基本上全部火車票都可以喺national rail個網度買，選啱車飛再click buy，就會自動load咗去唔同火車公司個網站度再續個payment process。由於我地二人同行，所以買咗2 together優惠票，買車飛時照買2 together飛，到左英國再喺車站做返個2 together pass就搞掂！記得喺搭火車時帶定飛仔同pass喺身，因為職員一定會查飛架！
http://www.nationalrail.co.uk/


住宿：
英國住宿真係好貴，求求其其都過千蚊一晚，為咗慳啲錢，我地多數都係住民宿/B&B。今次我地through Airbnb book咗2間，質素非常好，主人又好nice，本身都有啲擔心私隱度唔夠，不過原來我果個主人除咗接待你果日出現之後就幾乎日日失蹤，英國人竟然可以交低條鎖匙俾異國陌生人自出自入，實在令我呢個小心眼嘅香港人難以置信！

https://www.airbnb.com.hk/
 

倫敦民宿 from Airbnb

 

愛丁堡民宿 from Airbnb

 

Highland Portree B&B  (local tour幫我book)

 

Portree民宿個景係離哂大譜地靚...

 

湖區B&B 

通訊：
我地用giffgaff 的 £12/1 month plan, 可以無限上網 + 無限text + 250mins UK通話，都算係幾抵用！接收方面大致上都唔錯，不過注意高地, 湖區等偏遠地區未必收到訊號。
(由於giffgaff唔寄香港，我係搵台灣seller幫手買再寄過來。另外請請請記得喺香港好activate定張卡先，因為我上次去到London想搵返民宿個網睇地址，但張卡未上到網搞到要周圍搵wifi activate, 搞到一額汗！)

https://giffgaff.com/

食：

一早知英國食野貴，所以已帶定即食麵、即食飯、罐頭等等，夜晚唔出街食都餓唔死~ 不過要注意民宿/酒店有無煮食設備。有時我地又會去supermarket買簡單lunch食，我地最鐘意喺meal deal個貨架度買，買指定嘅三文治/沙律 + 小食/生果 + 果汁，會有discount呢！

 meal deal

 

 自已煮一解鄉愁又慳錢

(唔好講少，去10幾日真係會好掛住啲熱辣辣嘅飯...)
 

觀光：

基本上大部份觀光熱點都要買入場票，不過有啲係免費嘅，博物館大部份都係free的，不過我最鐘意都係坐公園，望下雀仔鴨仔BB仔又一日，渡假就是要這樣！

 

天氣：
9月英國天氣好好，落雨較少，主要帶一件薄羽絨褸 + 頸巾 + 冷外套 + 保暖底衫已經夠，薄羽絨主要上山先著，擋下風。同埋英國人好型，落雨都唔會擔傘的！所以我把傘都無乜點用過~

待續…